انا عارفه ان موضوع البلوج فني بحت يعني مالوش دعوه بالسياسه خالص(ولو ان السياسه فن)بس نوع تاني بعيد خالص عن اللي بنقدمه في البلوج..اللي عايزه اقوله اني انا لبست (التاج)ده واللي لبسهوني حد عزيز على قوي يعني عشان خاطر عيونها بس...بس لو لاقيت باب الشقه بيتهبد الساعه تلاته بالليل وخير اللهم اجعله خير لاقيت ناس لابسه اسود في اسود وعايزين ياخدوني اول اسم هانقطه هيكون اسم الغاليه دي...معلش ياغاليه..المهم معا نستفتح التاج ..هاه يا معين ونقول بسم الله الرحمن الرحيم
وعندك أول سؤال:لو مكنتش مصرى بس عربى كانت هتبقى نظرتك للمصريين و اللى بيحصل فى مصر دلوقتى ؟
والله انا هاحاول اخليها حياديه قدر الامكان..بس مع اني انا مصريه اهه بس باقول ان احنا اللي جبنا ده كله لنفسنا.وكتير افضل اسال (نفسي طبعا)لو لم اكن مصريا لوددت ان اكون ايه؟كل واحد في سره بقي
لو كنت اوربى او غير مسلم هتبقى ايه نظرتك للعرب و المسلميين؟
اولا ماحبش اكون اوروبيه والحمدلله اني مسلمه ..بس في حاله اني كنت غير كده بردو نظرتي هتكون حياديه بمعني اني هاعتبرهم شعب زي اي شعب.. ليهم ثقافتهم الخاصه وليهم دينهم الخاص وعقائدهم الخاصه بيهم ..يعني حريه كامله لايحق لاي شخص انه يتعدي عليهاولابد ان يتقبلهم المجتمع الاخر بما هو عليه بلا احتقار بلا اتهامات باطله.بدون اهانات للدين..وان زي مافيه البتنجان فيه المانجا..يعني زي مافيه الوحش فيه الحلو
لو قالوا لك انك بقيت رئيس جمهوريه هتعمل ايه ؟
بصراحه والله عمري مااتمنيت الامنيه دي ولا في حياتي هاتمناها..انا ماعرفش الرؤساء دول بيعرفو ينامو ازاي بالليل وهم مرتاحين!!!!بس لو بقيت صدقوني هتدعولي مش هتدعو على..
لوسمح لك برؤيه الرسول تقوللو ايه في كلمه واحده؟
قصرت..ونفسي تدعيلي بالمغفره
لو كنا فى عصر ازدهار الاندلس كنت تتخيل نفسك ازاى ؟
بصراحه مع اني بنت(يعني المفروض يكون ولد عايش في دور هارون الرشيد وكده) بس علطول باتخيل نفسي قاعده على شيزلونج اندلسي وقاعده جمبي واحده اندلسيه ماسكه مقشه والا مروحه ريش بردو باين وعماله تهوي على مع ان الدنيا سقعه اليومين دول والحته المهمه قوي اني لابسه جواهر وسلاسل ذهب كتيره لدرجه اني مش عارفه اخد نفسي والا الاساور مش عارفه ارفع ذراعي من كترهم..وطبعا البخور وياسلام لو عشر جواري حاوالايه عاملين يرقصو ويعملو حاجات جامده كده..ياسلام ..خيال مريض عارفه بس هي دي الحقيقه وبعدين كله من الاعلام بتاعنا..ربنا يسامحهم
لو خطبت او اتخطبتى لواحد و اثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟
بصراحه كل موقف وليه ظروفه ومش عشان باحبه بس اوافق على موقف زي ده.اولا دي تضحيه كبيره قوي قوي قوي وللاسف اليومين دول مش كتير اللي يستاهلو ان الواحد يضحي عشانهم..فلو هو طلع يستاهل التضحيه اكيد هاضحي..لان عندي ثقه في الله كبيره ان ربنا بيعوض
لو طلعت القمر تكتب ايه ؟
والله اليابان بقالها مده بتبيع في اراضي في القمر فلو لاقيت حته لسه ماتباعتش..هاكتب فيها هاي يا جماعه انا جيت اهه ووهاسيب الايميل ونمره الموبايل وعلى رنات بقي..
لو مررت التاج لحد ومجاوبش هتعمل ايه ؟
ولا حاجه ياباشا دي حريه شخصيه تاااااااااامه..
تمرر التاج لمين ؟
ده بقي اصعب سؤال لان فعلا ماعنديش حد امررله التاج على الاقل الفتره الحاليه..شويه كده هانشوف
posted by:MONA
6 comments:
السلام عليكم
اول مرة ادخل مدونتك وان شاء الله متكونش الاخيرة
ردود صريحة اوى
تحياتى
السلام عليكم ورحمة الله وبركاته
الحقيقة دي أول مرة أزور المدونة وإن شاء الله نتواصل دائماً
وردوك صريحة وموضوعية
بارك الله فيكي
تحياتي لكي
شكرا علي الرد لكن للعلم هذه المدونه بها شخصان وقد قلمت شريكتي بكتابه هذا الموضوع
شكرا للرد مره اخري
ههههه
هاتطلعى القمر وتسيبى رقم موبايلك وعلى رنات بقى؟
مش خايفة من المخلوقات الفضائية؟
رناتهم مش رنات عادية يعنى
اجابات عفوية ولذيذة
لك كل الحب
اهلا بيك يا نو تشانس وامير القلوب بجد نورتوني...
انا مني اللي لبست التاج...بد مبسوطه انكم شرقتم البلوج المتواضع بتاعي انا ودينا..ياريت زيارتكم لينا تتكرر
كامي حبيبه قلبي انت ماتعرفيش انا مبسوطه قد ايه انك زرتي البلوج بتاعي...انا اصلا اعرفك من قلب الاسد..وشفت المدونه بتاعتك جامده ...ياريت تتكرري الزياره
Post a Comment